Giçkin   Var giçkin
  Var miçkin
Çkin,
Mzuğauçaş berepe moro mu giçkin
Enni mele
Tanağa-is
Ʒxank̆ala mjora na çxant̆un k̆ele
Ar k̆uçxe Lazonas
  Melen ʒixas
Ar k̆uçxeti
  K̆urbeti.
Ʒ̆anas ar ok̆obinç̆et
Şilya do şilya ʒ̆anaş morderi
  Gebaderi
  Mç̆k̆oni-steri
İxis-ti, dobas-ti, ğvaris-ti kebinç̆et
İr ç̆vinobas ko mebinç̆et.
K̆aobaşa dopʒxuk̆ut
Xaobas mep̆t̆roxut do
  Var memdruk̆ut
Çkar mutuşen var mepxup̆umt
Haya ren na var giçkin.
Çkin
Mzuğauçaş berepe moro mu giçkin.
Lazona
Kyona
Mcveşişen çkineri
  P̆ap̆uliş meçkineri
Guri t̆uʒa miğunan
  K̆oçi-steri k̆oçi-şeni
Haya ren na vargiçkin enni
Gomʒude-i oropa var miğunan.
Mşkorineri pxroʒkitk̆on-ti
  Ğormoti t̆a-i!
Kok̆obit̆axamt ar panʒ̆ala mç̆k̆udi gyari
Var pşinaxumt nava-i
Ko gebubamt miğut̆ezk̆on
  Ar ç̆veti ʒ̆k̆a-i
Ti dudis maçanezk̆on-ti inç̆iri
Kok̆obit̆axamt cuma k̆ala
  Ar k̆ak̆ala ntxiri
  Moro e skiri.
Gemaş k̆unʒ̆ulepeşen
  Mep̆ç̆k̆odut do isa,
Çkva çaçxala gebulut
  Çkva t̆oba misa
Goimskimen Lazona
  Giçkin noğamisa
Porkinoras purki boret t̆ot̆epes
Nusalepe
Bozope dadalams çayiş ont̆ulepes
Guxti skit̆a tomalepes
Gağari cğat̆a tolepes.
Çkva çaçxala çkva misa
Çkine-i
Sum ndğe-i noğamisa
K̆armaxa boret
  Kçe mç̆ita mexuneri
Termoni bipxort
  Yari elaxuneri
Rak̆anis sifteri boret
  Karmat̆epes ğurni
Ʒ̆ilav-i-steri irden biç̆epe-çkuni
Guxti ʒxank̆ala murunʒxepes
  Ʒ̆k̆omile-i tolepes.
Guxti
Guxti do
  K̆aobate moxti
  Si-ti
Moxti
Guri çkunis nek̆na var gyobun
  Sontxa ginon goxti
Ç̆k̆omi şvi
  Muntxa ginon vi
Ar bixoronat
  Vit var p̆t̆rağudat
Ar golabdgitat noderepes
Ar gobubergat
  Jur k̆at̆işi filisepes
Çkva misa doxedi
  Çkva cinikis geşamxedit
Ko mebinç̆et ir ʒ̆k̆unis
Haya ko melik̆ori kogiğunna
  Kunis
 Gişkun
  Var gişkun
  Var mişkun.
Na mişkun,
Şkun;
Ar pşinomt oropa do Lazona
  E kyona
Lazona heya ren
  Oropa mu renna

Ç̆emu Çupina

Helimişi Xasani

Mecit Çakırusta

Nedim Tormanişi

Nurdoğan Demir Abaşi

Selma Koçiva

Sinan Badişi

Ʒ̆ate Ʒ̆at̆uri

Ʒ̆it̆aşi İskenderi