Dido parpalepe putxun ont̆ulepe do bağepes. Mskva renan. Msvalepe muşi ç̆ereli! Çxant̆upan(randupan) mteli k̆iyanas na iz̆iren perepete. Mara am mskva parpalepeşen didopek didi zarari meçapan. Parpalepeşi markvalepeşen kogamulun munt̆urepe.
Munt̆urepek imxornan zamzavatepe, meyvepe, tutunepe, mutu var dit̆alapan(nit̆alapan). Bazi oras dido iqven munt̆urepe.
Magzaleş treni gzaşi şkas(oşk̆enas) tamo tamo kogöç̆k̆u oxtimus. Uk̆açxe muk kododgitu. Magzalepe gale kagamaxtes, muiquya oz̆iramuşeni. Trenişi gzas koz̆ires dido mçxu munt̆urepe. Eşo didi t̆es ki treni var nalet̆u.
Antepe t̆es xçe luqu mç̆k̆omu(naimxors) parpalepeşi munt̆urepe, treniş gzaşi jur k̆ele iz̆irit̆es luquşi qonape. Mara ar luquşi but̆k̆a var iz̆iret̆u, xvala ğerepe kodoskidereet̆u.
Munt̆urepek mteli oç̆k̆omereet̆es, oç̆k̆omale çkva var z̆ireş k̆ule munt̆urepe gzas kogedgites oç̆k̆omale oz̆iramuşeni.