Ar mtuti do meli ak̆ardaşi dives do ona oxaçkuşe mendaxtes doren. Hantepes inuva şeni ar k̆alati nez̆i şinaxeri uğut̆es doren. Ar ndğas melik "Da-çkimis bere avu do coxo ma gebodvare, hek bidare" ya uʒ̆u doren. Mtutik idi ya uʒ̆u do meli igzalu doren. Meli oxorişe idu do k̆alatis na-dolobğut̆u nez̆epe ç̆ut̆a oç̆k̆omu doren. E-na meli onaşa na-moxtu, mtutik k̆itxu doren "Mu gyodvi beres?" ya. Melik "Moç̆k̆a-moç̆k̆a" gebodvi ya uʒ̆u doren.
Majurani ndğas xolo ona xaçkumt̆es doren. Melis xolo amşk̆orinu do "Mtuti cuma" ya, "oşkenani da-çkimis bere aven do oxorişe bidik̆o" ya do xolo heşo, ğomaneri steri uʒ̆u doren. Meli oxorişe idu do nez̆epeşi gverdi oç̆k̆omu doren. Meli na-moxtu "Beres mu gyodvit?" ya do mtutik k̆itxu doren. Melik "Gverda-gverda" ya tku doren.
Açkva masumani ndğas ar ç̆ut̆a ona doxaçku şk̆ule amşk̆orinu doren. Xolo "Mtuti-çkimi, mtutina" ya, "Ç̆it̆a da-çkimis bere aven do moşkvik̆o" ya do mtutis dido axveʒ̆u do mendaxtu doren. K̆alatis na-ort̆u mteli nez̆epe oç̆hk̆omu do onaşe komoxtu doren. "Mu gyodvit beres?" ya-şi, "Amoloksa-gamoloksa" ya uʒ̆u doren. K̆alatis nez̆i gamaçodu doren.
Ar ndğas mtutis amşk̆orinu do tku-ki "Çkun şinaxeri na-bort̆it hem nez̆epe op̆ç̆k̆omat!" ya. Meli ʒ̆oxleşen idu do k̆alati mt̆ut̆ate opşu doren. Haʒ̆i mtuti komoxtu oxorişa do ç̆angi iluğuşi nez̆epe var z̆iru doren. K̆alatis dolvaşuruşi mt̆ut̆a tolis kodolvabğu, e-do toli kodudgitu doren. Melik "Ar t̆oxt̆ori biçinem, hemuk toli dogik̆aams, çkimi k̆ala moxti" ya uʒ̆u doren. Mtuti melis konaonu doren.
İdes, ides, ides do ar rak̆anis kextes doren. Melik "Haşo tiʒ̆ale idi do t̆oxt̆ori komegagen" ya do moğerdinu doren. Mtuti tiʒ̆ale gelaxtuşi, p̆laç̆epunaşen ingrinu do doxoʒku doren.