Germas irdet̆u mt̆k̆uri uşkirişi nca.
Ar oras germaşa komoxtu ar mabağe, koz̆iru ağani uşkirişi nca do muşebura ntku:
-Ak mu mskva nca irden, aya viğaya!
Tamo tamo kexaçku(keşontxoru) ncaş cirek̆i, pesopes mutu ziyani var aqu, mendiğu(mendiqonu) oxori muşişa do ek orgupuna muşis kodorgu.
Majurani ʒ̆anas komoxtu mabağe xami xes dokaçari.
Muk kamek̆vatu ncaşi mt̆k̆uri peroni dudi, doskidu xvala t̆ani. T̆ani xamite ok̆ortu do k̆ayi uşkiriş k̆et̆i meşonz̆gipu. Uk̆açxe pupuli muşis paği ʒ̆k̆ariş let̆a nonʒaxu do p̆aç̆avrate dok̆iru.
Diz̆abunu uşkirişi nca, mara ağani do menceloni nat̆uşeni manişa dik̆aru.
Ncas ʒ̆k̆ari, qak doşups do manişa dirden: eşimers ar purcis jin, majurani purcepe gonʒ̆k̆ap̆s but̆k̆ape.
-Sum ʒ̆anaşk̆ule xçe guliş peroni pukirepe guinʒ̆k̆es.
Stvelis, pukirepe nat̆es svapes (svalepes) kamuinç̆es uşkirepe, dido loqa do memç̆itaneri(domç̆itaneri).